سیز یاخچی بیلیر‌سیز کی من نئچه آی دیر‌کی میدانا گلمیشم، اودا نه میدان، انتخابات میدانی. کی هر کسین ایشی دیور. البته دای ایندی ائله گورونورکی هر کسین ایشی اولا بیلرمیش

سلاملار اولسون عزیز همشهری لریمه

سیز یاخچی بیلیر‌سیز کی من نئچه آی دیر‌کی میدانا گلمیشم، اودا نه میدان، انتخابات میدانی. کی هر کسین ایشی دیور. البته دای ایندی ائله گورونورکی هر کسین ایشی اولا بیلرمیش.

گلندن بری، چوخلی طرحلرچکیب و یا قول‌‌‌‌‌لار وئرمیشم، مجلسلر قوروب سؤز دئمیشم. آغ‌ساققال‌لار ایچینده اوجاق قورموشام. مجازی گروه لاردا عکس ‌لریمی دال با دال قویموشام.آمما هله‌ده کی هله‌دی، ائؤز سؤزومون اوستونده وارام. هئچده قورخوم یوخدورکی بیر گون رأی گتیریب و نماینده اولسامدا‌. قول‌لاریمی یرینه یئتیرمه ‌سم‌ده، عیبی یوخدی، بیر مصاحبه‌ده و یا بیر سخنرانی‌ده، یری گوگی قاتیب، اوچ بهانه‌‌ینن، تقصیرلری آتارام اونون بونون بوینونا من خلاص. دای اوزوموز اولوب رحمتلیک سارا خالانین دابانی کیمی. دای آیاق داشیدا اونا اثر ائله‌میر. دونگه ده بوروق وئرمگه نه؟ قراریدی نفت مردومون سیفراسینا گله، گلمه‌دی کی هئچ، نفت دکلی ده اولکه‌دن گئتدی. بیر نفر اوتانمادی، اوندا من اوتاناجییام؟ بونلار منی یؤرمور چونکی هئچده چتین دیور بلکه منی یؤران، بو قدیمی پروژه‌لردی کی بیزه کئچمیش دوره‌لردن میراث قالیب. میراثا قالانلار قوتارمیر‌لار جانیمیز راحاتلاشا.

بونلاردان بیری‌ده بو فیروزآباد_هیرو یولی دیر. 27 کیلومتری توسباغا باشلاسایدی، ایندی سونا یئتیشمیشدی. قوتاریب قوتارماماقی بیر طرفه، بو سئوال –جاوابی دای منی یوروب. بیری گلیب بو یولدان سؤروشاندا اول گرک بیله‌سن هارالیدی .

دئسه هیرولیام یا کی هیرودا دانیشاندا گرک دییم‌ کی: دوزدی وعده‌سی بول، چوخ گوزل یول. پیچی یوخ ، انی چوخ. خالخالا لازیم، بوتون آذربایجان سرچم دن گلسین اولسون گیلانا عازیم. سیز منه رأی وئرون، ایکی گونده اولسون حاضیر، بو "خالخالیم"دا ناظیر.

دئسه کیوی‌لی‌ام یا گدیب کیوی‌ده دانیشاندا اوندا سؤز عوض اولوب گرک دییم: بو نه یول، چولاسی بول. باغی یوخ، داغی چوخ. کیوی قیراقدا قالسین؟ قویمارام. مسافری یولدا قالسین؟ دؤزمه‌رم.

سیز منه رأی وئرون، پیمانکاری مندن‌دی، قاباقین آلیب یولی کسرم. ایشی یاتیردیب ، کیوی یولون بزرم.

بویله جاوابلارینان کیوی هیرونی قاتیب اؤزومه رأی قازانیرام.

اوزوم اوزومه بیری ائشیدمه‌دن اوخورام:

داش داشا دیرناخ داشا

سیز ساواشا من تاماشا

رأی‌لریم صاندیقدا آشیب داشا، داشا

کیم جیغاز